ཨུ་རུ་སིའི་འཐབ་འཛིང་གནམ་གྲུས་མཚོ་ནག་གི་བར་སྣང་ནས་ཨ་མེ་རི་ཁའི་མྱུལ་ཞིབ་གནམ་གྲུར་བཀག་འགོག་བྱས། 

ཨུ་རུ་སིའི་རྒྱལ་སྲུང་པུའུ་ཡིས་ཟླ་བདུན་པའི་ཚེས་སུམ་ཅུའི་ཉིན་བསྒྲགས་པ་ལྟར་ན། ཨུ་རུ་སིའི་འཐབ་འཛིང་གནམ་གྲུས་ཉིན་དེར་མཚོ་ནག་གི་བར་སྣང་ནས་ཨུ་རུ་སིའི་རྒྱལ་མཚམས་བརྒལ་རྩིས་བྱེད་པའི་ཨ་མེ་རི་ཁའི་མྱུལ་ཞིབ་གནམ་གྲུ་གཉིས་ལ་བཀག་འགོག་བྱས་ཟེར།

བསྒྲགས་པ་ལྟར་ན། ཨུ་རུ་སིའི་ལྷོ་ཕྱོགས་དམག་ཁུལ་གྱི་མཁའ་སྲུང་སྒྲིག་ཆས་ཀྱིས་མཚོ་ནག་གི་བར་སྣང་དུ་ཨུ་རུ་སིའི་རྒྱལ་མཚམས་བརྒལ་རྩིས་བྱེད་པའི་ཨ་མེ་རི་ཁའི་མྱུལ་ཞིབ་གནམ་གྲུ་གཉིས་ཡོད་པ་ཤེས་རྗེས། སུའུ-27རྟགས་ཅན་གྱི་འགས་གཏོར་གནམ་གྲུས་བར་སྣང་ནས་བཀག་འགོག་བྱས་པ་དང་། བདེ་བླག་ངང་ཨ་མེ་རི་ཁའི་གནམ་གྲུ་མཐར་སྐྲོད་བཏང་བ་རེད་ཟེར།

ཨུ་རུ་སིའི་གནམ་གྲུ་འཕུར་སྐྱོད་བྱེད་སྐབས་འབྲེལ་ཡོད་ཀྱི་རྒྱལ་སྤྱིའི་བཅའ་ཁྲིམས་བརྩི་སྲུང་ནན་མོ་བྱེད་བཞིན་ཡོད་ལ། འཐབ་འཛིང་གནམ་གྲུས་བཀག་འགོག་ལས་འགན་ཡོངས་འགྲུབ་བྱས་རྗེས་བདེ་འཇགས་ངང་ཕྱིར་སྡོད་གནས་སུ་ལོག་པ་རེད།

ཨ་མེ་རི་ཁ་གཙོ་བྱས་པའི་བྱང་ཆིངས་རྩ་འཛུགས་ཀྱི་གནམ་གྲུ་རྒྱུན་པར་ཨུ་རུ་སིའི་རྒྱལ་མཚམས་སུ་འཕུར་ནས་མྱུལ་ཞིབ་བྱ་འགུལ་སྤེལ་བཞིན་ཡོད་པ་དང་། ཨུ་རུ་སི་ཡིས་དོན་དེར་མཐའ་གཅིག་ཏུ་ངོ་རྒོལ་བྱེད་བཞིན་ཡོད། ཟླ་འདིའི་ཚེས་གཅིག་ཉིན་དང་། ཚེས་བཅུ་བཞིའི་ཉིན། ཚེས་ཉེར་བདུན་བཅས་ལ་ཨུ་རུ་སིའི་འཐབ་འཛིང་གནམ་གྲུས་མཚོ་ནག་གི་བར་སྣང་ནས་ཨ་མེ་རི་ཁའི་མྱུལ་ཞིབ་གནམ་གྲུར་བཀག་འགོག་བྱས་པ་རེད།

ལོ་ཙཱ་བ། བསོད་ནམས་ཚེ་རིང་།