ཨ་ཧྥུའུ་ཧན་ཤར་ཕྱོགས་ས་ཁུལ་དུ་རླངས་འཁོར་འགས་གཏོར་འཇབ་རྒོལ་དོན་རྐྱེན་བྱུང་སྟེ་ཉུང་མཐར་ཡང་མི་སོ་བརྒྱད་ལ་ཤི་རྨས་ཐེབས། 

ཨ་ཧྥུའུ་ཧན་ནང་སྲིད་པུའུ་ཡིས་ཟླ་བདུན་པའི་ཚེས་སུམ་ཅུའི་ཉིན་བདེན་དཔང་བྱས་དོན། ཨ་ཧྥུའུ་ཧན་ཤར་ཕྱོགས་ཀྱི་ལུའུ་ཀི་ཨར་ཞིང་ཆེན་གྱི་ལྟེ་གནས་གྲོང་ཁྱེར་ཕུའུ་ལེ་ཨ་ལཱ་མུའུ་རུ་ཉིན་དེའི་དགོང་མོར་རླངས་འཁོར་འགས་གཏོར་འཇབ་རྒོལ་དོན་རྐྱེན་ཞིག་བྱུང་སྟེ། ཉུང་མཐར་ཡང་མི་སོ་བརྒྱད་ལ་རྨས་ཕོག་ཡོད་ཟེར།

ཨ་ཧྥུའུ་ཧན་ནང་སྲིད་པུའུ་ཡི་མགྲིན་ཚབ་པ་ཨ་ལི་ཨན་གྱིས་བཤད་རྒྱུར། ཚེས་སུམ་ཅུ་ཉིན་གྱི་དགོང་མོའི་དུས་ཚོད་བདུན་དང་སྐར་མ་བཞི་བཅུའི་སྟེང་། ལུའུ་ཀི་ཨར་ཞིང་ཆེན་གྱི་ལྟེ་གནས་གྲོང་ཁྱེར་ཕུའུ་ལེ་ཨ་ལཱ་མུའུ་ནས་རླངས་འཁོར་འགས་གཏོར་འཇབ་རྒོལ་དོན་རྐྱེན་བྱུང་། རྟོག་ཞིབ་རགས་ཙམ་བྱས་པ་ལྟར་ན། མི་སེར་དཀྱུས་མ་བརྒྱད་འཇབ་རྒོལ་ཁྲོད་རྐྱེན་ལམ་དུ་ཤོར་བ་དང་། མི་སུམ་ཅུར་རྨས་ཕོག་ཡོད་ཟེར།

ལུའུ་ཀི་ཨར་ཞིང་ཆེན་གྱི་ཉེན་རྟོག་ཅུའུ་ཡི་མགྲིན་ཚབ་པ་ཨེ་ཧཱ་མེད་ཏི་ཀྲ་དབྱེ་ཡིས་བཅར་འདྲི་དང་ལེན་བྱེད་སྐབས་བཤད་རྒྱུར། དོན་རྐྱེན་བྱུང་ས་ནི་ཕུའུ་ལེ་ཨ་ལཱ་མུའུ་གྲོང་ཁྱེར་གྱི་ཧྲི་ཀྲང་ཐང་ཆེན་ཡིན་ཞིང་། འགས་གཏོར་ལས་ཡུལ་དངོས་དེར་གཏོར་བརླག་ཆེན་པོ་ཐེབས་ཡོད་པ་དང་། མང་ཚོགས་ལ་འཇིགས་དངངས་ཆེན་པོ་བཟོས་ཡོད། རྨས་མ་དག་སྨན་ཁང་དུ་བསྐྱལ་ནས་གསོ་བཅོས་བྱེད་བཞིན་ཡོད་ལ། རྨས་མ་སྐོར་ཞིག་རྒྱལ་ས་ཁཱ་པོར་དུ་བསྐྱལ་ནས་གསོ་བཅོས་བྱེད་རྒྱུ་རེད་ཟེར།

ཨ་ཧྥུའུ་ཧན་ཐཱ་ལེ་པན་གྱི་མགྲིན་ཚབ་པ་མུའུ་ཅཱ་ཞེ་ཏི་ཡིས་དྲ་ཚིགས་བརྒྱུད་དེ་རྩ་འཛུགས་དེའི་དྲག་ཆས་མི་སྣས་འཇབ་རྒོལ་དོན་རྐྱེན་བཟོས་པ་ཁས་ལེན་མ་བྱས།

མཉམ་འབྲེལ་རྒྱལ་ཚོགས་ཀྱི་ཨ་ཧྥུའུ་ཧན་རོགས་སྐྱོར་ཚོགས་པས་ཚེས་ཉེར་བདུན་ཉིན་སྙན་ཞུ་སྤེལ་ཏེ་བཤད་རྒྱུར། ད་ལོའི་ལོ་སྟོད་དུ་བསྡོམས་པས་ཨ་ཧྥུའུ་ཧན་གྱི་མི་སེར་དཀྱུས་མ་སྟོང་གཅིག་དང་ཉིས་བརྒྱ་གྱ་གཉིས་རིགས་སྣ་ཚོགས་ཀྱི་དྲག་ཆས་འཁྲུག་རྩོད་ཁྲོད་རྐྱེན་ལམ་དུ་ཤོར་བ་དང་། གཞན་ཡང་མི་སེར་དཀྱུས་མ་སྟོང་གཉིས་བརྒྱ་དང་དོན་དྲུག་ལ་རྨས་ཕོག་ཡོད་ཟེར།

ལོ་ཙཱ་བ། བསོད་ནམས་ཚེ་རིང་།